Terapeutiese intervensies met kinders steun op die gebruik van spelmateriale as gespreksmedium. In Gestaltspelterapie word spelmateriale benut met die aanname dat kinders hul denke en gevoelens op die spelmateriale projekteer. Projeksie skep n gevoel van veiligheid wat daartoe bydra dat kinders inligting bespreek wat hul andersins nie sou opper nie. Handpoppe is n speltegniek wat verskeie voordele in die terapeutiese konteks inhou. Een van die uitstaande kenmerke van handpoppe as speltegniek, is dat dit kommunikasie in die terapeutiese konteks kan bevorder. Handpoppe kan tydens individuele intervensie en in groepsverband gebruik word. Die doel van hierdie studie was om die invloed van handpoppe as gespreksmedium tydens groepwerk met kinders in die middelkinderjare te bepaal. Vir die doel van die navorsing is opvoedkundige groepe wat op afkouery as onderwerp fokus met twee groepe kinders in die middelkinderjare geïmplementeer. Afknouery het n groot invloed op talle skoolkinders en is as n gepaste onderwerp vir die groepe beskou. In die studie is n gemengde navorsingsbenadering gevolg, met toegepaste navorsing as die tipe navorsing. n Dominante minder dominante navorsingsontwerp is gevolg. n Multi-groep na-toets navorsingsontwerp is vir die kwantitatiewe navorsing gebruik, terwyl n kollektiewe gevallestudie-ontwerp vir die kwalitatiewe deel van die navorsing gebruik is. Kwantitatiewe data het gefokus op die kommunikasie en interaksiepatrone tydens groepsessies waar handpoppe gebruik is teenoor dié sonder die gebruik van handpoppe. Data is deur middel van gestruktureerde observasie aan die hand van n observasieskedule ingesamel. Kwalitatiewe data het gefokus op die respondente se ervaring van die benutting van handpoppe tydens groepwerk. Semi-gestruktureerde onderhoude met die benutting van n semi-gestruktureerde onderhoudskedule is gebruik om laasgenoemde data in te samel. n Totaal van 10 respondente is op grond van doelgerigte steekproefseleksie vanuit kinders in die middelkinderjare wat n naskoolsentrum bygewoon het, geselekteer. Eenvoudige ewekansige steekproefseleksie is gebruik om die respondente in twee groepe van vyf respondente elk in te deel. Dieselfde groepwerkprogram is aan albei groepe aangebied. Die navorsingsbevindinge toon aan dat die benutting van handpoppe oor die algemeen voordelig vir die kommunikasie en interaksiepatrone in die twee groepe was. Dit het tot n verhoging van bydraes en van die inisiëring van gesprekke in die groepe gelei. Die respondente het groter betrokkenheid by die groep getoon en was meer geneig om ander groeplede in die groepsgesprek in te sluit. Respondente was ook minder geneig om bloot die mening van ander te volg wanneer handpoppe gebruik is. Die meeste respondente het aangetoon dat hulle dit geniet het om deur die handpoppe te praat. Die benutting van handpoppe het egter nie daartoe bygedra dat sensitiewe onderwerpe met negatiewe elemente meer geredelik bespreek is nie. Sommige respondente het dit moeilik gevind om gelyktydig op die groepsgesprek en op die manipulering van… Advisors/Committee Members: Le Roux, M.P. (Liana) (advisor).